जहांगीर आर्ट गॅलरीत धीरज हाडोळे यांचे "चित्तदर्शनी" हे कला प्रदर्शन

चित्रकार: धीरज हाडोळे

सुप्रसिद्ध समकालीन चित्रकार धीरज हाडोळे यांचे "चित्तदर्शनी" हे कला प्रदर्शन जहांगीर आर्ट गॅलरी, ऑडिटोरियम हॉल, काळा घोडा, मुंबई येथे दिनांक २३ ते २९ डिसेंबर २०२५ या कालावधीत भरणार आहे. ते तिथे सकाळी ११ ते सायंकाळी ७ या वेळेत सर्व कलारसिकांसाठी विनामूल्य खुले राहील.

              धीरज श्रीकृष्णराव हाडोळे हे मुंबईस्थित चित्रकार असून त्यांची चित्रे समकालीन अमूर्त चित्रकलेतील शांत, अंतर्मुख प्रवाहाशी नाते सांगतात. रेषा, आकार आणि अवकाश यांचा सूक्ष्म संवाद त्यांच्या चित्रांतून अनुभवायला मिळतो, ज्यामुळे ही चित्रे केवळ पाहण्याचा नव्हे तर अनुभवण्याचा अवकाश निर्माण करतात.

 

           अमरावती येथील शिवाजी चित्रकला महाविद्यालयातून त्यांनी A.T.D., सर जे.जे. स्कूल ऑफ आर्ट्स, मुंबई येथून B.F.A. (पेंटिंग) व A.T.C. (फोटोग्राफी) तसेच मुंबई विद्यापीठातून M.A. (पुरातत्त्व) पूर्ण केले आहे. चित्रकला, फोटोग्राफी आणि ऐतिहासिक स्मारकांचा अभ्यास हे त्यांच्या कार्याचे प्रमुख क्षेत्र असून त्यांनी देश-विदेशातील अनेक महत्त्वाच्या कला प्रदर्शनांत सहभाग घेतला आहे. विविध पुरस्कारांनी सन्मानित झालेल्या हाडोळे सध्या डोंबिवली (मुंबई) येथे कार्यरत आहेत.

 

धीरज हाडोळे यांची चित्रे त्या समकालीन अमूर्त प्रवाहाशी संवाद साधतात, जिथे रचना, अवकाश आणि शांतता यांना स्वतंत्र अभिव्यक्ती प्राप्त होते. त्यांच्या चित्रांत रंगांचा आवाका मर्यादित असला, तरी त्यातून एक खोल, स्थिर अवकाश हळूहळू उलगडत जातो. त्रिकोणी आणि सममित आकार श्वासासारखे एकमेकांत मिसळत चित्राला ध्यानात्मक लय देतात.

          चित्राच्या केंद्राकडे झुकणारे पृष्ठभाग प्रकाश आणि छायांच्या सूक्ष्म बदलांतून अदृश्य खोली निर्माण करतात. ही चित्रे पाहताना नजर थांबते, पाहणे थांबते आणि अनुभव सुरू होतो. ज्या क्षणी बाहेरचे जग मंदावते, त्या क्षणी हे चित्र आत बोलू लागते. वासिली कँडिन्स्की यांनी म्हटल्याप्रमाणे, चित्र हे डोळ्यांसाठी नसून आत्म्यासाठी असते. हा विचार इथे शब्दांशिवाय प्रकट होतो. दृश्य घटक महत्त्वाचे असले, तरी त्याहून अधिक महत्त्वाची ठरते ती अंतःप्रेरणा.

 

        धीरज हाडोळे यांच्या चित्रांत सपाट कॅनव्हास हळूहळू अवकाशात रूपांतरित होत जातो. स्तरांवर उभारलेले आकार, शिवलेल्या पृष्ठभागांची संवेदनशील रचना आणि छाया प्रकाशांचे सूक्ष्म नाते यांमुळे चित्रात स्पष्ट त्रिमितीय परिणाम निर्माण होतो. आकार कॅनव्हासवर स्थिर न राहता पुढे येतात, मागे सरकतात आणि पाहणाऱ्याभोवती एक शांत अवकाश तयार करतात.

         या चित्रांत त्रिमिती ही  दृश्य परिणाम  अनुभव बनते. प्रत्येक स्तर, प्रत्येक कडा आणि प्रत्येक रंगछटा अवकाशाची जाणीव अधिक गडद करते. त्यामुळे चित्र पाहणे हा क्षण न राहता, त्या अवकाशात प्रवेश करण्याची प्रक्रिया ठरते. जिथे कॅनव्हास अनुभवाचा विस्तार बनतो.

 

        काही चित्रांत ही लय अधिक स्पष्टपणे जाणवते. मध्यभागी संतुलन असून दोन्ही बाजूंना सूक्ष्म हालचालींची चाहूल लागते. पृष्ठभागावरील टेक्सचर स्थिर विचारांसारखे भासतात. जणू रेषांचा एक स्मरणप्रवास. चित्रातील अवकाश यांचा परस्पर संवाद चित्राला दृश्य तसेच एक अंतर्मुख अनुभव बनवतो.

 

        अखेर ही चित्रे पाहणाऱ्याला थांबायला शिकवतात. विचारांच्या गडबडीतून बाहेर काढून, आतल्या शांततेकडे नेणारा हा प्रवास आहे. म्हणूनच धीरज हाडोळे यांची चित्रे समकालीन अमूर्त चित्रकलेचा भाग असतानाच, पाहणाऱ्याच्या अंतर्मनात उमटणारा एक मौन संवाद ठरतात. जिथे अर्थ हळूहळू अनुभवातून उलगडत जातो.